ആഗ്രഹം

ഒരുനാളെനിയ്ക്കൊരു കടലി-

ന്നടിയിലൊളിയ്ക്കേണം

മുട്ടിയുരുമ്മി നീന്തിയടുക്കും

മീനുകള്‍ക്കുമ്മ കൊടുക്കേണം..

കൊമ്പന്‍ സ്രാവിന്‍ നെഞ്ചിലി-

രുന്നാ കടലു മുഴുവന്‍ നീന്തേണം...

പവിഴപ്പുറ്റുകള്‍ക്കിടയിലൊളിക്കും 

മുത്തുകള്‍ തേടിയെടുക്കേണം 

കടലാമകളുടെ കയ്യില്‍ തൂങ്ങി 

കടലിന്നാഴാമിളക്കേണം 

കടലിന്നടിയിലൊളിക്കും  സൂര്യനെ  

കൈയ്യാലെടുത്തു പൊക്കേണം...

രാവിന്‍ കുടചൂടിയണയും  അമ്പിളി-

മാമനെ പുണരേണം;

നീലക്കടലിന്‍ നിലയില്ലാച്ചൂഴിയില്‍ 

മുങ്ങാം കൂളികളുമിടേണം, 

മത്സ്യകന്യകമാരുടെ മാന്ത്രിക-

ചെപ്പു തുറന്നൊന്നു നോക്കേണം...

തിരമാലകള്‍ തന്‍ തേരില്‍ കയറി

കരയോടടുത്തു വരേണം!

എണ്ണാതുള്ളൊരു മോഹങ്ങളിനിയും

എന്നുടെയുള്ളില്‍ ഒളിഞ്ഞിരുപ്പു...  

എന്നുടെ മോഹമിതെന്തൊരു 

മോഹമിതെന്നു ഞാനും നിരൂപിപ്പൂ!!!