Friday, June 22, 2012

മഴയും ജീവിതവും

പലപ്പോഴും എനിക്ക്  തോന്നിയിട്ടുണ്ട്, മഴക്കാലം ജീവിതം പോലെത്തന്നെയാണെന്ന്... ചില നേരങ്ങളില്‍ തെളിഞ്ഞും, മറ്റ്  ചിലപ്പോള്‍ ഇരുണ്ടും മഴക്കാലത്തിന്റെ ഏറ്റക്കുറച്ചിലുകള്‍ പോലെ ജീവിതവും തെളിഞ്ഞും ഇരുണ്ടും കളിയ്ക്കുന്നു. ജീവിത ദു:ഖങ്ങള്‍ കണ്ണീരില്‍ ഒഴുക്കി കളയുന്നതു പോലെ മഴത്തുള്ളികള്‍ വരണ്ട മനസ്സിനെയും മണ്ണിനേയും നനച്ചു നിര്‍മ്മലമാക്കുന്നു. 

മഴക്കാലത്തെ മാനം പോലെ ഇടയ്ക്ക് കറുത്തിരുണ്ട്‌ , ഘോരം ഘോരമായ് ഗര്ജ്ജിയ്ക്കുന്ന ഇടി മുഴക്കവും പേറി ജീവിതവും ചിലപ്പോഴെങ്കിലും കറുത്തു പോകാറുണ്ട്... തെളിഞ്ഞ മനസ്സില്‍ കരിനിഴല്‍ വീഴ്ത്തി ഘനഗംഭീരമായ് കദനങ്ങള്‍ ജീവിതത്തെ ആടിയുലയ്ക്കാറുണ്ട് ... പേമാരിയും കൊടുങ്കാറ്റും കൂടി പെയ്തിറങ്ങുന്ന മഴമേഘങ്ങള്‍ ജീവിതത്തെയും ഇളക്കി മറയ്ക്കുന്നു.

അതേ  സമയം, തെളിഞ്ഞ ആകാശത്തിനു കീഴില്‍ നനുത്ത് പെയ്യുന്ന ചാറ്റല്‍ മഴ ഒരനുഭൂതി തന്നെയാണ്! സങ്കീര്‍ണ്ണമായ ജീവിത വ്യഥകളെ തരണം ചെയ്തതിനു ശേഷം വരുന്ന പുലരിയും അത് പോലെ തന്നെ സുന്ദരവും അനുഭൂതിപ്രദവുമാണ്. വര്‍ഷക്കാലത്ത് പെയ്യുന്ന മഴ ഒരിയ്ക്കലും നിലയ്ക്കില്ലെന്ന് തോന്നാറുള്ളത് പോലെ, ജീവിത ദു:ഖങ്ങളും ഒരിയ്ക്കലും അവസാനിയ്ക്കില്ലെന്നു തോന്നിപ്പോകും... പക്ഷെ, ഏതൊരു മഴക്കാലവും ഒരിയ്ക്കല്‍ കഴിയുമെന്നത് പോലെ ജീവിത ദു:ഖങ്ങളും ഒരിയ്ക്കല്‍ അവസാനിച്ചേ മതിയാകൂ...

സമൃദ്ധമായ് പെയ്തൊഴിഞ്ഞ മഴക്കാലത്തിനു ശേഷം വരുന്ന വസന്തമെന്ന പോലെ ദുഷ്കരമായ കാലങ്ങള്‍ തരണം ചെയ്ത് ജീവിതവും പച്ച പിടിയ്ക്കും... പ്രകൃതിയുടെ അഭേദ്യമായ നിയമമാണിത്... ഒരു രാത്രിക്ക് പകലെന്ന പോലെ, ഒരു വേനലിന്  ഒരു മഴയെന്ന പോലെ, ഒരിറക്കത്തിനു ഒരു കേറ്റമെന്ന പോലെ, ജീവിതം ഒരു ദു:ഖത്തിന് ഒരു സുഖവും കരുതിയിരിയ്ക്കുന്നു...

ഒന്ന് കരഞ്ഞാല്‍ ഒരു കനത്ത മഴ പെയ്തു തോര്‍ന്ന ആശ്വാസമാണ്... ഒരു ചിരി വിരിയുന്നത് മഴയ്ക്ക്‌ ശേഷം വിടരുന്ന തെളിഞ്ഞ ആകാശം പോലെ സുന്ദരമാണ്... മഴയും  ജീവിതവും തെളിഞ്ഞും ഇരുണ്ടും പെയ്തും മൂടിക്കെട്ടിയും ഇടയ്ക്ക് കൊതിപ്പിക്കുകയും ഇടയ്ക്ക് ദു:ഖിപ്പിക്കുകയും ഇടയ്ക്ക് സന്തോഷിപ്പിക്കുകയും ചെയ്തു കൊണ്ടേയിരിക്കുന്നു...






ചിത്രങ്ങള്‍ക്ക് കടപ്പാട് : ഗൂഗിള്‍ ഇമേജ്   

14 comments:

ajith said...

മഴയ്ക്കും ജീവിതത്തിനും സാമ്യമേറെയുണ്ട് അല്ലേ?

Nisha said...

അതെ അജിത്‌, ആ തോന്നല്‍ ഈയിടെയായി ശക്തിയാര്‍ജജിച്ചിരിക്കുന്നു...

നന്ദി,
നിഷ

WEDDING said...

ഒരിക്കൽ നിറഞ്ഞും ഒരിക്കൽ മെലിഞ്ഞും
ഒഴുകും പുഴ പോലെ
ഇടയ്ക്കു തളിർക്കും ഇടയ്ക്കു വിളറും
ഇവിടെ ജീവിതങ്ങൾ ,,,,,,

RAGHU MENON said...

every cloud has a silver lining !
that is the hope -
well conveyed

Nisha said...

Thank you Raghu!
Regds,
Nisha

Nisha said...

Very true.. Thank You Sreelal for visiting Random Thoughts and sharing your opinion.

Regards,
Nisha

© Mubi said...

ജീവിതം പോലെ ഒളിഞ്ഞും തെളിഞ്ഞും മഴ പെയ്തു തോരുന്നു.....

നാച്ചി (നസീം) said...

എന്താ പ്രശ്നം ,,ഞാന്‍ വന്നായിരുന്നല്ലോ വീണ്ടും മഴയുമായി നിഷ ,പഷേ ഈ മഴയ്ക്ക് നല്ല കുളിര്‍ നാട് കാണാന്‍ കൊതിയാകുന്നു ,ആശംസകള്‍ നിഷ,,,,ഈ തീം മാറ്റണം കേട്ടോ

Arun Kappur said...

മഴക്കാലത്തെ ജീവിതത്തോടുപമിച്ചത് നന്നായിട്ടുണ്ട്. പക്ഷെ, എനിക്ക് നേരെ തിരിച്ചാ!! മഴയാണേറെയിഷ്ടം. പ്രത്യേകിച്ച് നാട്ടിലാണെങ്കില്‍. മഴ തിമര്‍ത്തു പെയ്യുമ്പോള്‍ ബൈക്കിലൊരു യാത്ര അതാണെനിക്ക് ഏറ്റവും ഇഷ്ടമായ വിനോദം.

Unknown said...

നല്ല ആശയവും മികച്ച അവതരണവും ...ആശംസകള്‍

Nisha said...

അതെ ഇരുണ്ടും തെളിഞ്ഞും ജീവിതവും മഴയും മുന്നേറുന്നു... നന്ദി മുബി!

Nisha said...

നാച്ചി, ഇവിടെ വീണ്ടും കണ്ടത്തില്‍ ഏറെ സന്തോഷം! ഈ തീം കുറയ്ക്കാന്‍ ശ്രമിയ്ക്കാം; മഴയെ ഏറെ സ്നേഹിയ്ക്കുന്ന ഞാന്‍ അതിനെ ഒഴിവാക്കുന്നതെങ്ങിനെ?
നാടിന്റെയും മഴയുടെയും കുളിരുപകര്‍ന്നു കൊതിപ്പിച്ചുവെങ്കില്‍ സദയം ക്ഷമിയ്ക്കുക...

Nisha said...

അരുണ്‍ , മഴയും മഴയത്തെ സവാരിയും ഇഷ്ട്ടമാണെന്നറിഞ്ഞതില്‍ സന്തോഷം!

Nisha said...

ഗഫൂര്‍ കാ ദോസ്ത്! നന്ദി , ഈ പ്രോത്സാഹത്തിനും, നല്ല വാക്കുകള്‍ക്കും!

Of Little Trips and Great Learnings

The other day, we (some staff, volunteers and service users of Mary Seacole House, Liverpool) went on a day trip to Llangollen. This wasn&#...